Прывiтальнае слова Мiнiстра замежных спраў Рэспублiкi Беларусь У.Макея у рамках сустрэчы з прадстаўнiкамi сродкаў масавай iнфармацыi (27 снежня 2013 года, г.Мiнск)

Добры вечар, дарагія сябры, калегі, спадары і спадарыні!

Мне вельмі прыемна вітаць вас сёння ў Міністэрстве замежных спраў Рэспублікі Беларусь напярэдадні Новага года. У мінулым годзе мы таксама сустракаліся, гэта наша чарговая сустрэча, і ёсць усе падставы лічыць, што традыцыя будзе прадоўжана. Мець добрыя традыцыі – гэта вельмi важна і добра!

Мінулы год быў багаты на розныя падзеі і з’явы. Не буду іх усе пералічваць. Адзначу толькі, што ў журналісцкай супольнасці было багата тэмаў, багата месца для палёту вашай творчай фантазіі.

Міністэрства замежных спраў заўсёды імкнулася і будзе імкнуцца да ўсталявання добрых адносін з журналістамі – у атмасферы адкрытасці, узаемнай павагі і ўзаемнага даверу.

Хацелася б шчыра падзякаваць за вашу нялёгкую працу, якая патрабуе не толькі таленту і інтэлекту, але і самаадданасці і грамадзянскай адказнасці.

Канешне, усе мы – розныя. Розныя па сваіх характарах і светапоглядах. Розныя па выражэннях сваіх пачуццяў, па адносінах да тых ці іншых падзей і з’яў…

Але ўсіх нас павінна аб’ядноўваць адно – любоў да сваёй Радзімы. Нягледзячы на розныя погляды, мы павінны думаць аб тым, каб зрабіць як мага больш на карысць сваёй краіны і свайго народа. Давайце разам будзем крочыць у адным накірунку, каб захаваць і ўмацаваць суверэнітэт і незалежнасць нашай дзяржавы.

А пажадаць… Хацелася б пажадаць кожнаму з нас заставацца годным чалавекам у любых абставінах. Не губляць простых чалавечых якасцей: радавацца і ўсміхацца ў адказ на дабро, ніколі не мірыцца са злом, быць гатовым заўсёды дапамагчы людзям, якія трапілі ў бяду. А яшчэ – простага чалавечага шчасця. Са школьных часін памятаю выдатны верш Максіма Танка, які сёння, думаецца, будзе вельмі дарэчы:

Простае шчасце людское,
Так, як і наша з табою,
Пэўна, складаецца з солі,
З хлеба, сабранага ў полі,
З поту, з дарожнага пылу,
З роднага небасхілу,
З дружбы, мацнейшай ад смерці,
З песні… І так мне здаецца,
Каб з чаго іншага скласці,
Дык ці было б яно шчасцем?

Шчасця вам, дабра і ўсяго самага найлепшага ў Новым годзе!